ભરૂચ : ભરૂચ જિલ્લાના પ્રાયોજના વહીવટદાર દ્વારા સરકારી કન્યા છાત્રાલય, ભરૂચ અને સરકારી કુમાર છાત્રાલય, વડદલાની આકસ્મિક મુલાકાત લેવામાં આવી હતી. મુલાકાતનો મુખ્ય હેતુ છાત્રાલયમાં રહેતા વિદ્યાર્થીઓને આપવામાં આવતી સુવિધાઓ અને વ્યવસ્થાની પ્રત્યક્ષ ચકાસણી કરવાનો હતો.
મુલાકાત દરમિયાન પ્રાયોજના વહીવટદારે છાત્રાલયોમાં ચાલી રહેલી LPG ગેસ કનેક્શનની કામગીરી અંગે ઝીણવટભરી માહિતી મેળવી હતી. રસોડામાં ગેસ સુરક્ષા અને ઇંધણ વ્યવસ્થા અંગે સમીક્ષા કરીને સંબંધિત અધિકારીઓને જરૂરી સૂચનાઓ આપવામાં આવી હતી.
તેમણે છાત્રાલયના રસોડા, ડાઇનિંગ હોલ તેમજ વિદ્યાર્થીઓના રહેણાંક રૂમોની જાતે તપાસ કરી અને સાફ-સફાઈની સ્થિતિનું નિરીક્ષણ કર્યું હતું. વિદ્યાર્થીઓને સ્વચ્છ અને આરોગ્યપ્રદ વાતાવરણ મળી રહે તે માટે સ્વચ્છતાના ધોરણો જાળવવા પર ખાસ ભાર મૂકવામાં આવ્યો હતો.
નિરીક્ષણના અંતે છાત્રાલયના વહીવટ અને વ્યવસ્થાપનને વધુ સુદ્રઢ બનાવવા માટે માર્ગદર્શન આપવામાં આવ્યું હતું. આ મુલાકાતથી છાત્રાલયના સ્ટાફમાં વધુ સતર્કતા જોવા મળી હતી અને વહીવટી તંત્ર દ્વારા વિદ્યાર્થીઓની સુવિધાઓ પ્રત્યેની પ્રતિબદ્ધતા પણ વ્યક્ત કરવામાં આવી હતી.
