વાંકલ.
વાંકલ તાલુકાના ઉમરપાડા વિસ્તારમાં નેશનલ હાઇવે નં. 56 પર આજે ગંભીર માર્ગ અકસ્માત સર્જાયો હતો, જેમાં બાઈક અને ફોર વ્હીલર કાર વચ્ચે જોરદાર અથડામણ થતાં પતિ-પત્નીને ગંભીર ઇજાઓ પહોંચી હતી.
પ્રાપ્ત માહિતી મુજબ, ઉમરપાડા ખાતે વાડી બસ સ્ટેન્ડ નજીક ઝંખવાવથી નેત્રંગ તરફ જતાં માર્ગ પર ફોર વ્હીલર કાર (નંબર GJ15 CA 1005)ના ચાલકે ગફલતભરી અને બેફામ રીતે વાહન હંકારતાં સામે આવતી મોટરસાયકલ (નંબર GJ 30 C 0196) સાથે અથડામણ સર્જી હતી. અકસ્માત એટલો જોરદાર હતો કે બાઈક પર સવાર સુનિલભાઈ અને તેમની પત્ની ગીતાબેનને પગ તથા ઘૂંટણના નીચેના ભાગે ગંભીર ઇજાઓ પહોંચી હતી.
ઘટનાની જાણ થતાં જ તાત્કાલિક 108 એમ્બ્યુલન્સ સેવા સ્થળ પર પહોંચી અને ઇજાગ્રસ્ત દંપતીને પ્રાથમિક સારવાર માટે ઝંખવાવ ખાતે ખસેડવામાં આવ્યા હતા. ત્યાંથી તેમની હાલત ગંભીર હોવાથી વધુ સારવાર માટે વ્યારા હોસ્પિટલ ખાતે રીફર કરવામાં આવ્યા હતા.
આ બનાવ અંગે ઉમરપાડા પોલીસ મથકે ફરિયાદ નોંધાઈ છે. પોલીસ દ્વારા અકસ્માતનું કારણ જાણવા વધુ તપાસ હાથ ધરવામાં આવી રહી છે.
