ભરૂચ જિલ્લામાં એક મહિલાએ ઘરેલુ વિવાદ અને હિંસાથી કંટાળી 181 અભયમ ટીમની મદદ લીધી હતી. પીડિતાના જણાવ્યા મુજબ પતિ સાથે પૈસાની બાબતે રોજબરોજ ઝઘડા થતા હતા. પીડિતાએ પતિનો મોબાઇલ તપાસતા લોન સંબંધિત મેસેજ જોવા મળ્યા, જેના આધારે પતિ લોન લઈ રહ્યા હોવાની માહિતી મળી હતી. આ મુદ્દે પૂછપરછ કરતા પતિ ગુસ્સે થઈ ગયા અને પીડિતાને મારઝુડ કરી ઘરેથી કાઢી મૂકવાની ધમકી આપી.
માહિતી મળતા જ 181 અભયમ ટીમ તાત્કાલિક સ્થળ પર પહોંચી અને પીડિતાનું કાઉન્સેલિંગ કર્યું હતું. તપાસ દરમિયાન જાણવા મળ્યું કે પીડિતાનો એક દીકરો છે, જે સ્કૂલમાં અભ્યાસ કરે છે, પરંતુ પતિ તેની ફી પણ ભરતા નહોતા. પતિ પોતાની આવકનો મોટો ભાગ લોન ચુકવવામાં ખર્ચી દેતા હોવાથી ઘરખર્ચ માટે પૂરતા પૈસા આપતા નહોતા અને પરિવાર સાથે યોગ્ય સંવાદ પણ કરતા નહોતા, જેના કારણે ઘરમાં સતત તણાવનો માહોલ રહેતો હતો.
ત્યારબાદ ટીમે પતિનું પણ કાઉન્સેલિંગ કર્યું અને પરિવાર પ્રત્યેની જવાબદારી સમજાવી. બાળકના શિક્ષણ, ઘરખર્ચ અને પારદર્શક આર્થિક વ્યવહારના મહત્વ અંગે માર્ગદર્શન આપવામાં આવ્યું.
કાઉન્સેલિંગ બાદ પતિએ પોતાની ભૂલ સ્વીકારી પત્ની પાસે માફી માંગી અને ભવિષ્યમાં લોન ન લેવાની તેમજ પરિવારની જવાબદારી યોગ્ય રીતે નિભાવવાની ખાતરી આપી. તેમણે લેખિતમાં માફીનામું આપીને સુધારાનો વિશ્વાસ વ્યક્ત કર્યો.
આ રીતે 181 અભયમ ટીમના પ્રયાસોથી બંને પક્ષો વચ્ચે સુખદ સમાધાન થયું હતું. પીડિતાએ ટીમનો આભાર વ્યક્ત કર્યો.
