ભરૂચ : ભરૂચ-શુકલતીર્થ રોડ પર આવેલા કરમાલી ગામ નજીક મોડી રાત્રે મુખ્ય માર્ગ પર દીપડો નજરે પડતાં વિસ્તારમાં ભયનો માહોલ સર્જાયો છે. મુખ્ય રોડ પર નિર્ભયપણે લટાર મારતા દીપડાને જોઈ ત્યાંથી પસાર થઈ રહેલા એક કારચાલકે સમગ્ર ઘટનાનો વીડિયો પોતાના મોબાઇલ કેમેરામાં કેદ કર્યો હતો. આ વીડિયો સોશિયલ મીડિયામાં વાયરલ થતાં સ્થાનિકોમાં ચિંતા વ્યાપી ગઈ છે.
પ્રાપ્ત માહિતી મુજબ, કરમાલી ગામ નજીક રાત્રિના સમયે દીપડો મુખ્ય માર્ગ પર થોડો સમય સુધી ફરતો જોવા મળ્યો હતો. રોડ પરથી પસાર થતાં વાહનચાલકોએ પણ દીપડાને જોઈ આશ્ચર્ય વ્યક્ત કર્યું હતું. ઘટનાનો વીડિયો સામે આવ્યા બાદ કરમાલી ગામ તેમજ આસપાસના વિસ્તારોના રહેવાસીઓમાં દહેશતનો માહોલ જોવા મળી રહ્યો છે.
તાજેતરના સમયમાં જંગલ વિસ્તારની નજીક આવેલા ગામોમાં વન્યજીવોના પ્રવેશની ઘટનાઓમાં વધારો નોંધાઈ રહ્યો છે. ખોરાક અને રહેઠાણની શોધમાં દીપડા સહિતના વન્યજીવો રહેણાંક વિસ્તારો અને માર્ગો તરફ આવી રહ્યા હોવાનું માનવામાં આવે છે. કરમાલી ગામ નજીક બનેલી આ ઘટના પણ વન્યજીવોની વધતી અવરજવર અંગે ચિંતા ઉભી કરનારી બની છે.
ઘટનાની જાણ વન વિભાગને કરવામાં આવી હોવાનું જાણવા મળ્યું છે. વન વિભાગ દ્વારા સ્થિતિ પર નજર રાખવામાં આવી રહી છે. સ્થાનિક લોકોને ખાસ કરીને રાત્રિના સમયે સાવચેતી રાખવા, એકલા બહાર ન નીકળવા તેમજ દીપડો નજરે પડે તો તેની નજીક જવાનો કે તેને ઉશ્કેરવાનો પ્રયાસ ન કરીને તાત્કાલિક વન વિભાગ અથવા પોલીસને જાણ કરવાની અપીલ કરવામાં આવી છે.
