વાંકલ :
માંગરોળ તાલુકાના વાંકલ વિસ્તારમાં હોટેલ, રેસ્ટોરન્ટ અને ધાબાઓમાં આરોગ્ય વિભાગ દ્વારા સઘન તપાસ હાથ ધરવામાં આવી હતી. જિલ્લા આરોગ્ય અધિકારી તથા તાલુકા આરોગ્ય અધિકારીની સૂચના હેઠળ પ્રાથમિક આરોગ્ય કેન્દ્ર, વાંકલની ટીમે કુલ 14 હોટેલ, રેસ્ટોરન્ટ અને ધાબાઓમાં તપાસ કરી હતી.
20 ઓગસ્ટ 2026ના રોજ પ્રાથમિક આરોગ્ય કેન્દ્ર વાંકલના મેડિકલ ઓફિસર ડૉ. ખ્યાલ ચૌધરી, તલાટી કમ મંત્રી તથા પેરામેડિકલ સ્ટાફ દ્વારા સંયુક્ત રીતે આ ચેકિંગ હાથ ધરાયું હતું. તપાસ દરમિયાન હોટેલ-રેસ્ટોરન્ટના પરિસરની સ્વચ્છતા, પીવાના પાણીની સ્વચ્છતા તેમજ ખાદ્ય પદાર્થોની ગુણવત્તા અને તેના સંગ્રહ-જાળવણીની સ્થિતિનું નિરીક્ષણ કરવામાં આવ્યું હતું.
આ ઉપરાંત ફાયર સેફ્ટીની વ્યવસ્થા, રેસ્ટોરન્ટમાં કામ કરતા કર્મચારીઓનું આરોગ્ય, જરૂરી લાયસન્સ અને અન્ય દસ્તાવેજોની પણ ચકાસણી કરવામાં આવી હતી. આરોગ્ય વિભાગની ટીમે ખાસ કરીને ગ્રાહકોને સ્વચ્છ અને ગુણવત્તાયુક્ત ખોરાક મળી રહે તેમજ ખાદ્ય પદાર્થોના કારણે કોઈ આરોગ્યલક્ષી સમસ્યા ઊભી ન થાય તે અંગે જરૂરી તકેદારી રાખવા સંચાલકોને સૂચના આપી હતી.
તપાસ દરમિયાન જ્યાં સ્વચ્છતા સહિતની બાબતોમાં ક્ષતિ જોવા મળી હતી ત્યાં સંબંધિત હોટેલ અને રેસ્ટોરન્ટના સંચાલકોને લેખિત નોટિસ આપવામાં આવી હતી. સાથે જ ખામીઓ તાત્કાલિક દૂર કરી નિયમોનું પાલન કરવા સૂચના આપવામાં આવી હતી.
આરોગ્ય વિભાગની આ કાર્યવાહીથી વાંકલ વિસ્તારમાં હોટેલ-રેસ્ટોરન્ટ સંચાલકોમાં દોડધામ જોવા મળી હતી. આગામી દિવસોમાં નોટિસ આપવામાં આવેલા સ્થળોએ ફરી તપાસ કરી સૂચનાઓનું પાલન થયું છે કે નહીં તેની ચકાસણી કરવામાં આવે તેવી શક્યતા છે.
