ભરૂચ :
મહિલાઓને રોજગારલક્ષી તાલીમ સાથે સ્વરોજગારની તક મળી રહે અને તેઓ આત્મનિર્ભર બને તે હેતુથી ભરૂચમાં મહત્વપૂર્ણ પહેલ કરવામાં આવી હતી. ઉત્થાન ચેરિટેબલ ટ્રસ્ટ તથા SAKATA INX India Pvt. Ltd., Panoliના CSR સહયોગથી બ્યુટી પાર્લર ક્ષેત્રે તાલીમ મેળવનાર બહેનોને બ્યુટી પાર્લર કીટનું વિતરણ કરવામાં આવ્યું હતું.
ભરૂચના આંબેડકર ભવન ખાતે યોજાયેલા કાર્યક્રમમાં બ્યુટી પાર્લર ક્ષેત્રે રોજગારલક્ષી તાલીમ પૂર્ણ કરનાર મહિલાઓને કીટ અર્પણ કરવામાં આવી હતી. તાલીમ બાદ જરૂરી સાધન-સામગ્રી મળી રહે તે માટે આ કીટનું વિતરણ કરાયું હતું.
કાર્યક્રમનો મુખ્ય ઉદ્દેશ મહિલાઓને માત્ર તાલીમ પૂરતી સીમિત ન રાખી, તેમને સ્વરોજગાર શરૂ કરવા માટે જરૂરી સાધનો ઉપલબ્ધ કરાવી આર્થિક રીતે સશક્ત બનાવવાનો હતો. બ્યુટી પાર્લર ક્ષેત્રે પોતાનું કામ શરૂ કરીને મહિલાઓ આવકનું સાધન ઊભું કરી શકે તે માટે તેમને પ્રોત્સાહિત કરવામાં આવી હતી.
આ પ્રસંગે ભરૂચના ધારાસભ્ય રમેશભાઈ મિસ્ત્રી સહિત વિવિધ મહાનુભાવો ઉપસ્થિત રહ્યા હતા. ઉત્થાન ચેરિટેબલ ટ્રસ્ટના પ્રતિનિધિઓ તેમજ SAKATA INX India Pvt. Ltd.ના CSR પ્રતિનિધિઓની ઉપસ્થિતિમાં મહિલાઓને કીટનું વિતરણ કરવામાં આવ્યું હતું.
કાર્યક્રમ દરમિયાન મહિલાઓને આત્મવિશ્વાસ સાથે સ્વરોજગાર તરફ આગળ વધવા અને પોતાની આવકનું સાધન ઊભું કરવા પ્રોત્સાહિત કરવામાં આવી હતી.
