ભરૂચ :
મતદાર યાદીની સ્પેશિયલ ઇન્ટેન્સિવ રિવિઝન (SIR) પ્રક્રિયા અને મુખ્ય ચૂંટણી કમિશનર જ્ઞાનેશકુમાર સામે કોંગ્રેસ દ્વારા કરવામાં આવી રહેલા વિરોધના પગલે ભરૂચમાં પણ સોમવારે રાજકીય ગરમાવો જોવા મળ્યો હતો. સવારે જિલ્લા કોંગ્રેસ દ્વારા વિરોધ કાર્યક્રમ યોજાયા બાદ સાંજના સમયે ભાજપ દ્વારા ખાસ પત્રકાર પરિષદ યોજી કોંગ્રેસના આક્ષેપો સામે પોતાનો પક્ષ રજૂ કરવામાં આવ્યો હતો. SIRને લઈને દેશભરમાં ચૂંટણી પંચની કામગીરી અંગે રાજકીય આક્ષેપ-પ્રતિઆક્ષેપ ચાલી રહ્યા છે.
ભરૂચના ધારાસભ્ય રમેશ મિસ્ત્રી, નવનિયુક્ત જિલ્લા ભાજપ પ્રમુખ પરેશ લાડ સહિતના આગેવાનોએ પત્રકાર પરિષદને સંબોધી કોંગ્રેસ દ્વારા મુખ્ય ચૂંટણી કમિશનર અને SIR પ્રક્રિયાને લઈને કરવામાં આવી રહેલા આક્ષેપોને ખોટા ગણાવ્યા હતા.
ભાજપના આગેવાનોના જણાવ્યા મુજબ, SIR હેઠળ મતદાર યાદીની ચકાસણી અને પુનરીક્ષણની પ્રક્રિયાને લઈને કોંગ્રેસ દ્વારા કરવામાં આવી રહેલો વિરોધ રાજકીય કારણોસર કરવામાં આવી રહ્યો છે. ભાજપે એવો પણ દાવો કર્યો હતો કે કોંગ્રેસ એક પછી એક રાજ્યમાં ચૂંટણીમાં સીટ ગુમાવી રહી હોવાથી હવે ચૂંટણી પંચની કામગીરી સામે આક્ષેપો કરી રહી છે.
બીજી તરફ, SIR પ્રક્રિયાને લઈને કોંગ્રેસ દ્વારા મતદાર યાદીમાંથી નામો દૂર કરવા સહિતના મુદ્દાઓ ઉઠાવીને ચૂંટણી પંચની કામગીરી સામે સવાલો કરવામાં આવી રહ્યા છે. કોંગ્રેસે CEC જ્ઞાનેશકુમારના રાજીનામાની પણ માંગ ઉઠાવી છે.
આમ, સોમવારે સવારે ભરૂચમાં SIR અને CEC જ્ઞાનેશકુમારના મુદ્દે કોંગ્રેસના વિરોધ બાદ સાંજે ભાજપની પત્રકાર પરિષદ યોજાતા બંને પક્ષ વચ્ચે આક્ષેપ-પ્રતિઆક્ષેપનો રાજકીય માહોલ સર્જાયો હતો.
