ભરૂચ : ભરૂચની સિવિલ હોસ્પિટલ અને જનરલ નર્સિંગ સ્કૂલ ખાતે નશાબંધી અને વ્યસનમુક્તિ અંગે જનજાગૃતિ ફેલાવવાના હેતુથી સેમિનારનું આયોજન કરવામાં આવ્યું હતું. સેમિનારમાં આરોગ્ય ક્ષેત્રના નિષ્ણાતો અને અધિકારીઓએ ઉપસ્થિત નાગરિકો તથા વિદ્યાર્થીઓને વ્યસનની શારીરિક, માનસિક અને સામાજિક આડઅસરો અંગે વિસ્તૃત માહિતી આપી હતી.
નશીલા પદાર્થોના સેવનથી થતાં વિવિધ રોગોથી બચવા તેમજ સ્વસ્થ અને તંદુરસ્ત જીવનશૈલી અપનાવવા અંગે માર્ગદર્શન આપવામાં આવ્યું હતું. નિષ્ણાતોએ વ્યસનથી દૂર રહેવા અને સમાજમાં વ્યસનમુક્તિ અંગે જાગૃતિ ફેલાવવા અનુરોધ કર્યો હતો.
સેમિનાર દરમિયાન ઉપસ્થિત લોકોને વ્યસનમુક્તિ અંગેની માહિતીદર્શક પત્રિકાઓ અને માર્ગદર્શિકાનું વિતરણ કરવામાં આવ્યું હતું. જનરલ નર્સિંગ સ્કૂલના તાલીમાર્થીઓ, સિવિલ હોસ્પિટલના કર્મચારીઓ તેમજ મોટી સંખ્યામાં નાગરિકોએ સેમિનારમાં ઉત્સાહપૂર્વક ભાગ લીધો હતો. આ કાર્યક્રમનો હેતુ યુવાનો સહિત સમાજના વિવિધ વર્ગોમાં વ્યસનના દુષ્પરિણામો અંગે જાગૃતિ વધારવાનો હતો.
