ભરૂચ: ભરૂચ જિલ્લાના વાલિયા તાલુકાના વટારિયા ગામે આવેલી શ્રી ગણેશ ખાંડ સહકારી મંડળીની મિલકતોની હરાજી સામે ખેડૂતોમાં વિરોધનો સૂર ઉઠ્યો છે. એનસીડીસી દ્વારા સરફેસી (SARFAESI) એક્ટ હેઠળ મંડળીની 49.03 હેક્ટર જમીન, પ્લાન્ટ અને મશીનરી સહિતની મિલકતોની આગામી 18 નવેમ્બરના રોજ યોજાનારી ઈ-હરાજી અટકાવવાની માંગ સાથે ભરૂચ જિલ્લા ખેડૂત હિત રક્ષક સમિતિએ જિલ્લા કલેક્ટરને આવેદનપત્ર પાઠવ્યું છે.
પૂર્વ ધારાસભ્ય મહેશ વસાવાની આગેવાનીમાં સમિતિના આગેવાનોએ કલેક્ટરને રજૂઆત કરી સમગ્ર હરાજી પ્રક્રિયા તાત્કાલિક સ્થગિત કરવાની માંગ કરી હતી.
સમિતિના જણાવ્યા અનુસાર, મંડળીની મિલકતોની હરાજી માટે રૂ.186.48 કરોડની અનામત કિંમત નક્કી કરવામાં આવી છે. જોકે, આટલી મોટી રકમનું મૂલ્યાંકન કઈ પદ્ધતિથી કરવામાં આવ્યું છે, જમીન, પ્લાન્ટ અને મશીનરીની કિંમત કેવી રીતે નક્કી કરાઈ છે તે અંગે સમિતિએ સવાલો ઉઠાવ્યા છે. હરાજીની સમગ્ર પ્રક્રિયાની કાયદેસરતા અને પારદર્શિતા અંગે નિષ્પક્ષ તપાસ કરાવવાની પણ માંગ કરવામાં આવી છે.
આવેદનપત્રમાં વધુમાં જણાવાયું છે કે, વર્ષોથી મંડળી સાથે જોડાયેલા હજારો ખેડૂત શેરધારકોને હરાજી અંગે પૂરતી જાણ કરવામાં આવી છે કે કેમ અને તેમને પોતાનો પક્ષ રજૂ કરવાની યોગ્ય તક આપવામાં આવી છે કે કેમ તેની તપાસ થવી જોઈએ.
સમિતિએ કલેક્ટર સમક્ષ હરાજી સંબંધિત તમામ દસ્તાવેજો અને ફાઇલો મંગાવી ઉચ્ચસ્તરીય તપાસ કરાવવાની માંગ કરી છે. ખેડૂતો અને શેરધારકોના કાયદેસરના આર્થિક હિતોનું રક્ષણ સુનિશ્ચિત ન થાય ત્યાં સુધી 18 નવેમ્બરની ઈ-હરાજી પ્રક્રિયા પર રોક લગાવવા રજૂઆત કરવામાં આવી છે.
પૂર્વ ધારાસભ્ય મહેશ વસાવા સહિત ખેડૂત આગેવાનોએ ચીમકી આપી છે કે, ખેડૂતોના હિતોને ધ્યાનમાં લીધા વિના એકતરફી કાર્યવાહી કરવામાં આવશે તો આગામી દિવસોમાં સ્થાનિક સ્તરે આંદોલન વધુ ઉગ્ર બનાવવામાં આવશે. હવે જિલ્લા વહીવટી તંત્ર આ રજૂઆતના પગલે શું નિર્ણય લે છે તેના પર ખેડૂતો અને શેરધારકોની નજર મંડાઈ છે.
