ભરૂચ, શુક્રવાર: તાલુકા-જિલ્લા પંચાયત સામાન્ય ચૂંટણી–૨૦૨૬ને ધ્યાનમાં રાખીને ઝાડેશ્વર સ્થિત કે.જી.એમ. હાઈસ્કૂલ ખાતે મતદાન મથક પર ફરજ બજાવનાર પોલિંગ સ્ટાફ માટે તાલીમ કાર્યક્રમનું આયોજન કરવામાં આવ્યું હતું. મામલતદારશ્રી ભરૂચના માર્ગદર્શન હેઠળ યોજાયેલી આ તાલીમમાં પ્રિસાઇડિંગ ઓફિસર તેમજ પોલિંગ ઓફિસર તરીકે નિયુક્ત કર્મચારીઓને ચૂંટણી પ્રક્રિયા અંગે વિગતવાર માર્ગદર્શન આપવામાં આવ્યું હતું.
આ તાલીમ કાર્યક્રમમાં અંદાજિત ૫૫૩ જેટલા કર્મચારીઓએ હાજરી આપી ચૂંટણી સંબંધિત વિવિધ મુદ્દાઓની વિસ્તૃત માહિતી મેળવી હતી. તાલીમ દરમિયાન મતદાન પ્રક્રિયા, ઈવીએમ મશીનનો યોગ્ય ઉપયોગ, મતદાન દરમિયાનની જવાબદારીઓ તથા આદર્શ આચારસંહિતાનું પાલન કરવા અંગે માસ્ટર ટ્રેનર દ્વારા માર્ગદર્શન આપવામાં આવ્યું હતું.
પ્રેક્ટિકલ સમજ સાથે ચૂંટણી કામગીરીને સરળ, સુચારુ અને પારદર્શક રીતે પાર પાડવા માટે જરૂરી સૂચનાઓ આપવામાં આવી હતી. નિષ્પક્ષ અને વ્યવસ્થિત ચૂંટણી યોજવા માટે આવી તાલીમો અત્યંત મહત્વપૂર્ણ ગણાય છે અને તમામ કર્મચારીઓએ નિષ્ઠાપૂર્વક તાલીમનો લાભ લીધો હતો.
