ગૌરાંગ મકવાણાની ગાંધીનગર ખાતે GEDAના ડાયરેક્ટર તરીકે બદલી
ભરૂચ જિલ્લાના જિલ્લા કલેક્ટર કચેરી ભરૂચ ખાતે આજે નવા જિલ્લા કલેક્ટર તરીકે ડો. નવનાથ ગવહાણેએ સત્તાવાર રીતે પદભાર સંભાળ્યો હતો. ગુજરાત રાજ્ય સરકાર દ્વારા તાજેતરમાં કરવામાં આવેલી આઈએએસ અધિકારીઓની બદલીના ભાગરૂપે તેમની નિમણૂક ભરૂચ જિલ્લાના કલેક્ટર તરીકે કરવામાં આવી છે.
અગાઉ ભરૂચ જિલ્લાના કલેક્ટર તરીકે ફરજ બજાવી રહેલા ગૌરાંગ મકવાણાની ગાંધીનગર ખાતે ગુજરાત એનર્જી ડેવલપમેન્ટ એજન્સી (GEDA)ના ડાયરેક્ટર તરીકે બદલી કરવામાં આવી છે. સાથે જ તેઓ GPCL અને UGVCLના મેનેજિંગ ડાયરેક્ટર તરીકે વધારાનો હવાલો પણ સંભાળશે.
નવા કલેક્ટર ડો. નવનાથ ગવહાણે ભરૂચ કલેક્ટર કચેરી ખાતે પહોંચતા જ જિલ્લા વહીવટી તંત્રના અધિકારીઓ અને કર્મચારીઓએ તેમનું સ્વાગત કર્યું હતું. આ પ્રસંગે બદલી પામેલા કલેક્ટર ગૌરાંગ મકવાણાએ નવા કલેક્ટરને જિલ્લા વહીવટ, વિકાસ કાર્યો અને ચાલી રહેલી વિવિધ સરકારી યોજનાઓ અંગેની જરૂરી માહિતી આપી સત્તાવાર રીતે ચાર્જ સુપરત કર્યો હતો. કચેરીના અધિકારીઓ અને સ્ટાફની ઉપસ્થિતિમાં ચાર્જ હસ્તાંતરણની પ્રક્રિયા પૂર્ણ કરવામાં આવી હતી.
ચાર્જ સંભાળ્યા બાદ નવા કલેક્ટર ડો. નવનાથ ગવહાણેએ જણાવ્યું હતું કે, ભરૂચ જિલ્લાની જનતાને પારદર્શક, ઝડપી અને અસરકારક વહીવટી સેવાઓ પૂરી પાડવા તેઓ સંપૂર્ણ પ્રતિબદ્ધ રહેશે. તેમણે જણાવ્યું કે સરકારની જનકલ્યાણકારી યોજનાઓનો લાભ છેવાડાના માનવી સુધી પહોંચે તે માટે તંત્ર વધુ સક્રિય રીતે કાર્ય કરશે.
તેમણે વિકાસલક્ષી યોજનાઓના ગતિશીલ અમલ, નાગરિકોની ફરિયાદોના સમયસર નિરાકરણ, ગ્રામ્ય અને શહેરી વિસ્તારોમાં આધુનિક સુવિધાઓના વિસ્તરણ તેમજ લોકકેન્દ્રિત વહીવટને પ્રાથમિકતા આપવામાં આવશે તેવી પણ ખાતરી વ્યક્ત કરી હતી. જિલ્લા વિકાસ માટે તમામ વિભાગો વચ્ચે સંકલન સાથે કાર્ય કરી વધુ પરિણામલક્ષી કામગીરી પર ભાર મુકવામાં આવશે તેમ પણ તેમણે જણાવ્યું હતું.
જિલ્લા વહીવટી તંત્રમાં થયેલા આ મહત્વપૂર્ણ ફેરફારને લઈને અધિકારીઓ, રાજકીય આગેવાનો તેમજ સામાજિક સંગઠનોમાં નવી અપેક્ષાઓ સાથે ચર્ચાનો માહોલ જોવા મળી રહ્યો છે. ભરૂચ જિલ્લો ઔદ્યોગિક તેમજ વિકાસની દ્રષ્ટિએ મહત્વનો જિલ્લો હોવાથી નવા કલેક્ટરના નેતૃત્વ હેઠળ વિકાસકાર્યોને વધુ ગતિ મળશે તેવી આશા વ્યક્ત કરવામાં આવી રહી છે.
