વાંકલ: આજના ડિજિટલ યુગમાં સોશિયલ મીડિયાનો વધતો પ્રભાવ જ્યાં એક તરફ સુવિધા આપે છે, ત્યાં બીજી તરફ તેના દુરુપયોગ અને ઓનલાઈન નાણાકીય છેતરપિંડીના બનાવોમાં પણ સતત વધારો થઈ રહ્યો છે. ખાસ કરીને બાળકો અને કિશોરોમાં સાયબર સુરક્ષા અંગે જાગૃતિ લાવવી સમયની માંગ બની છે. આ પરિસ્થિતિને ધ્યાનમાં રાખી માંગરોળ પોલીસ દ્વારા એક સરાહનીય પહેલ હાથ ધરવામાં આવી હતી.
માંગરોળ તાલુકાના વાંકલ ગામે આવેલી ઉચ્ચતર પ્રાથમિક શાળામાં પોલીસ વિભાગ દ્વારા ‘સાયબર અવેરનેસ’ વિષયક વિશેષ જાગૃતિ કાર્યક્રમનું આયોજન કરવામાં આવ્યું હતું. કાર્યક્રમનો મુખ્ય હેતુ વિદ્યાર્થીઓને સાયબર ગુનાઓથી બચવાના ઉપાયો અને ડિજિટલ સુરક્ષાનું મહત્વ સમજાવવાનો હતો.
આ કાર્યક્રમ વાંકલ ઓપી (આઉટપોસ્ટ) ના હેડ આનંદભાઈ ચૌધરીના અધ્યક્ષસ્થાને યોજાયો હતો. તેમણે વિદ્યાર્થીઓને મોબાઈલ ફોન અને ઈન્ટરનેટનો સમજદારીપૂર્વક અને સુરક્ષિત રીતે ઉપયોગ કરવાની સલાહ આપી હતી. સાથે જ અજાણી લિંક્સ પર ક્લિક ન કરવું, OTP કે બેંક સંબંધિત માહિતી કોઈ સાથે શેર ન કરવી તેમજ સોશિયલ મીડિયા પર પોતાની અંગત માહિતી જાહેર ન કરવા અંગે માર્ગદર્શન આપ્યું હતું.
આનંદભાઈ ચૌધરીએ ઉદાહરણો સાથે સમજાવ્યું કે સાયબર ઠગો કેવી રીતે લોકોને પોતાની જાળમાં ફસાવે છે અને સાવચેતી જ સૌથી મોટું રક્ષણ છે. વિદ્યાર્થીઓએ પણ ઉત્સાહપૂર્વક પ્રશ્નો પૂછ્યા અને સાયબર સુરક્ષા અંગે ઉપયોગી માહિતી મેળવી.
આ પ્રસંગે વાંકલ ઉચ્ચતર પ્રાથમિક શાળાના આચાર્ય રમેશભાઈ ચૌધરી સહિત શાળાનો સમગ્ર સ્ટાફ ઉપસ્થિત રહ્યો હતો. શાળા પરિવાર દ્વારા પોલીસ વિભાગની આ પહેલને બિરદાવવામાં આવી હતી અને વિદ્યાર્થીઓની સુરક્ષા તેમજ જાગૃતિ માટે આવા કાર્યક્રમો સમયાંતરે યોજાતા રહે તે જરૂરી હોવાનું જણાવાયું હતું.
