ભરૂચ:
ભરૂચ શહેરના બી ડિવિઝન પોલીસ સ્ટેશન વિસ્તારમાં આવેલી જૂની સિવિલ હોસ્પિટલની પાછળના ભાગે મોટા ચાર રસ્તા પાસે ખુલ્લી જગ્યામાં ચાલતા ગેરકાયદેસર આંક-ફરકના (સટ્ટા-બેટિંગ) જુગાર પર પોલીસે બાતમીના આધારે સફળ દરોડો પાડ્યો છે. આ રેડ દરમિયાન પોલીસે જુગાર રમાડનાર અને રમનાર બે શખ્સોને રંગેહાથ ઝડપી પાડ્યા છે, જ્યારે આ રેકેટ ચલાવનાર મુખ્ય શખ્સને વોન્ટેડ જાહેર કરી કાયદેસરની કાર્યવાહી હાથ ધરી છે.
મળતી માહિતી મુજબ, ભરૂચ શહેર બી ડિવિઝન પોલીસ સ્ટેશનના અ.પો.કો. અરવિંદભાઇ ગોવિંદભાઇ તથા પોલીસ કાફલો પેટ્રોલિંગમાં તેમજ પોલીસ સ્ટેશનમાં હાજર હતા, તે દરમિયાન બાતમી મળી હતી કે, મોહંમદ કૈફ ઉર્ફે ચપાટી (રહે. અબ્દુલવાડ, ભરૂચ) નામના શખ્સના ઈશારે જૂની સિવિલ પાછળ મોટા ચાર રસ્તા પાસે ખુલ્લી જગ્યામાં આંક-ફરકના આંકડા લખીને જુગાર રમાડવામાં આવી રહ્યો છે.
આ બાતમીના આધારે પોલીસે બે પંચોને સાથે રાખીને ઉપરોક્ત જગ્યા પર ખાનગી વાહનોમાં જઈને ઓચિંતો દરોડો (રેડ) પાડ્યો હતો. પોલીસના આગમનથી સ્થળ પર દોડધામ મચી ગઈ હતી, પરંતુ પોલીસે સ્થળ પરથી બે ઈસમોને ઝડપી પાડવામાં સફળતા મેળવી હતી.
પકડાયેલા આરોપીઓ અને જપ્ત કરાયેલ મુદ્દામાલ પોલીસે પંચોની હાજરીમાં બંને પકડાયેલા આરોપીઓની અંગજડતી અને પૂછપરછ હાથ ધરી હતી: ૧. આંકડા લખનાર આરોપી: મુસ્તાક મિયાં મોહંમદ મસ્તાન શેખ (ઉ.વ. ૫૯, રહે. ફુરજા રોડ, ભોલન શાહની દરગાહ પાસે, ભરૂચ) નામના શખ્સ પાસેથી સટ્ટા-બેટિંગના આંકડા લખેલી ૫ ચિઠ્ઠીઓ, ૬ કોરી ચિઠ્ઠીઓ, ૧ બોલપેન તથા રોકડા રૂા. ૨,૮૭૦/- મળી આવ્યા હતા. ૨. આંકડા લખાવનાર આરોપી: પરેશભાઈ બાબુભાઈ રાઠોડ (ઉ.વ. ૩૩, રહે. વેજલપુર બામણીયા ઓવારા, ભરૂચ) નામના શખ્સ પાસેથી આંકડા લખેલી ૨ ચિઠ્ઠીઓ તથા રોકડા રૂા. ૯૬૦/- મળી આવ્યા હતા. પોલીસે સ્થળ પરથી કુલ રૂા. ૩,૮૩૦/- ની રોકડ રકમ તેમજ સટ્ટા-બેટિંગની ચિઠ્ઠીઓ અને સાહિત્ય જપ્ત કરી પંચનામું બનાવ્યું હતું.
પકડાયેલા આરોપી મુસ્તાક મિયાંની કડક પૂછપરછ કરતા તેણે કબૂલાત કરી હતી કે તેઓ આ સટ્ટા-બેટિંગના આંકડા મોહંમદ કૈફ ઉર્ફે ચપાટી હુશેન પઠાણ (રહે. અબ્દુલવાડ, ભરૂચ) ના કહેવાથી પોતાના આર્થિક લાભ માટે લખી-રમાડી રહ્યા હતા.
આ સમગ્ર મામલે ભરૂચ બી ડિવિઝન પોલીસે પકડાયેલા બે આરોપીઓ અને વોન્ટેડ જાહેર કરાયેલા મુખ્ય સૂત્રધાર મોહંમદ કૈફ વિરુદ્ધ જુગાર ધારાની કલમ-૧૨(અ) મુજબ ગુનો નોંધી આગળની કાયદેસરની તપાસ હાથ ધરી છે. હાઈપ્રોફાઈલ અને જાહેરમાં ચાલતા આ જુગારના રેકેટનો પર્દાફાશ થતા અસામાજિક તત્વોમાં ફફડાટ ફેલાઈ ગયો છે.
