ભરૂચ જિલ્લાના જંબુસર તાલુકાના કાવી ગામમાં ભારે વરસાદની વચ્ચે એક મકાનનો ભાગ ધરાશાયી થવાની ઘટના સામે આવી છે. સદનસીબે ઘટનાના સમયે મકાનમાં કોઈ હાજર ન હોવાથી કોઈ જાનહાનિ કે ઇજાની ઘટના બની નથી.
આ ઘટના કાવી ગામના મોટા ચકલા વિસ્તારમાં આવેલી માલજીવાલા ખડકીમાં બની હતી. યુસુફ હાસીમ માલજીવાલાના મકાનનો એક ભાગ અચાનક તૂટી પડતાં મકાનને ભારે નુકસાન થયું હતું.
Advertisement
પ્રાપ્ત માહિતી મુજબ, આ મકાનમાં હાલમાં કોઈ રહેતું ન હતું અને તેનો ઉપયોગ ઘરવખરી તેમજ અન્ય સામાનના સંગ્રહ માટે કરવામાં આવતો હતો. ઘટના સમયે મકાન ખાલી હોવાથી મોટી દુર્ઘટના ટળી હતી.
ઘટનાની જાણ થતાં ગામના સરપંચ અને તલાટી તાત્કાલિક ઘટનાસ્થળે પહોંચ્યા હતા. તેમણે મકાનના માલિક યુસુફ હાસીમ માલજીવાલાની મુલાકાત લઈ નુકસાન અંગે માહિતી મેળવી હતી તેમજ પરિસ્થિતિની સમીક્ષા કરી હતી.
