ભરૂચ :
ભરૂચના લિંક રોડ પર આવેલી મયુર પાર્ક સોસાયટીમાં શ્વાનોના આતંકને લઈને રહીશોમાં રોષ જોવા મળી રહ્યો છે. સોસાયટીના અનેક રહીશોને શ્વાનોએ બચકા ભર્યા હોવાના આક્ષેપો સાથે સ્થાનિક રહીશો એકત્ર થઈ એ ડિવિઝન પોલીસ મથકે પહોંચ્યા હતા અને સમગ્ર મામલે લેખિત અરજી આપી રજૂઆત કરી હતી.રહીશોના જણાવ્યા મુજબ, સોસાયટીમાં એક રહીશ દ્વારા પાલતુ શ્વાન રાખવામાં આવે છે. આ શ્વાનના કારણે સોસાયટીમાં રહેતા અન્ય લોકોને મુશ્કેલીનો સામનો કરવો પડી રહ્યો હોવાની ફરિયાદ કરવામાં આવી છે. રહીશોએ આક્ષેપ કર્યો છે કે શ્વાનને લઈને અગાઉ પણ સંબંધિત રહીશ સમક્ષ રજૂઆત કરવામાં આવી હતી, પરંતુ સમસ્યાનો યોગ્ય ઉકેલ આવ્યો નથી.
સ્થાનિકોના જણાવ્યા પ્રમાણે, સોસાયટીમાં શ્વાનના કારણે ભયનું વાતાવરણ ઊભું થયું છે. સોસાયટીના કેટલાક રહીશોને શ્વાનોએ બચકા ભર્યા હોવાના આક્ષેપો કરવામાં આવ્યા છે. ખાસ કરીને સોસાયટીમાં અવરજવર કરતા રહીશો, બાળકો અને અન્ય લોકોની સલામતી અંગે ચિંતા વ્યક્ત કરવામાં આવી રહી છે. રહીશોએ જણાવ્યું હતું કે સોસાયટી જેવી રહેણાંક જગ્યામાં શ્વાનને લઈને કોઈ અનિચ્છનીય ઘટના ન બને તે માટે યોગ્ય વ્યવસ્થા જરૂરી છે. વારંવારની પરેશાનીને કારણે રહીશોમાં રોષ ફેલાયો હોવાનું પણ સામે આવ્યું છે.
શ્વાન અંગે સંબંધિત રહીશને રજૂઆત કરવા જતા તેમની સાથે અપશબ્દો બોલવામાં આવતા હોવાનો પણ સ્થાનિકો દ્વારા આક્ષેપ કરવામાં આવ્યો છે. સમસ્યાનો ઉકેલ લાવવા માટે વાતચીત કરવાનો પ્રયાસ કરવામાં આવ્યો હોવા છતાં મામલો વણસ્યો હોવાની રહીશોની ફરિયાદ છે. આથી અંતે સોસાયટીના રહીશો એકત્ર થઈ એ ડિવિઝન પોલીસ મથકે પહોંચ્યા હતા અને લેખિત અરજી આપી સમગ્ર મામલે યોગ્ય તપાસ કરી કાર્યવાહી કરવાની માગ કરી હતી.રહીશોએ પોલીસને આપેલી અરજીમાં શ્વાનના કારણે ઊભી થતી સમસ્યા, રહીશોને થતી પરેશાની તથા શ્વાનના બચકાના આક્ષેપો અંગે રજૂઆત કરી હતી. સાથે જ ભવિષ્યમાં કોઈ ગંભીર ઘટના ન બને તે માટે મામલે યોગ્ય તપાસ કરી જરૂરી કાર્યવાહી કરવાની માગ કરવામાં આવી છે. મયુર પાર્ક સોસાયટીના રહીશો દ્વારા કરવામાં આવેલી રજૂઆતને પગલે હવે પોલીસ દ્વારા અરજીના આધારે સમગ્ર મામલે તપાસ હાથ ધરવામાં આવી હોવાનું જાણવા મળ્યું છે.
