સુરત/ભરૂચ:
ગુજરાતમાં વીજ ટ્રાન્સમિશન લાઇન અને ટાવર ઊભા કરવાના મુદ્દે ખેડૂતોમાં સરકાર સામે અસંતોષ વધી રહ્યો છે. ઊર્જા વિભાગના નવા પરિપત્ર તેમજ ‘ધ ઇન્ડિયન ટેલિગ્રાફ એક્ટ’ હેઠળ કરવામાં આવતા હુકમો સામે સુરત અને ભરૂચ જિલ્લાના અસરગ્રસ્ત ખેડૂતો દ્વારા વિરોધ શરૂ કરવામાં આવ્યો છે.
આ મુદ્દે સુરત-ભરૂચ જિલ્લાના અસરગ્રસ્ત ખેડૂતો ઓલપાડ તાલુકાના આંધી ગામે એકત્ર થયા હતા અને આગામી દિવસોમાં સરકાર સામે આંદોલન ઉગ્ર બનાવવાની રણનીતિ અંગે ચર્ચા કરી હતી.
કિસાન કોંગ્રેસના ચેરમેન જયેશ પટેલે જણાવ્યું હતું કે, ઓલપાડ તાલુકામાં કલેક્ટર દ્વારા કરવામાં આવેલા હુકમનો ખેડૂતો વિરોધ કરશે. આગામી 12મી તારીખે અસરગ્રસ્ત ખેડૂતો સુરત કલેક્ટર કચેરીએ પહોંચીને હુકમ રદ કરવાની માંગ સાથે રજૂઆત કરશે.
વધુમાં ઓલપાડમાં ‘સત્યાગ્રહ છાવણી’ શરૂ કરવાની પણ જાહેરાત કરવામાં આવી છે. જો ખેડૂતોની માંગણીઓનો ઉકેલ નહીં આવે તો આગામી તબક્કામાં નેશનલ હાઈવે-48 અથવા એક્સપ્રેસ હાઈવે બંધ કરવાની ચીમકી આપવામાં આવી છે.
ખેડૂતોનો આક્ષેપ છે કે ટ્રાન્સમિશન લાઇનના મુદ્દે તેમની રજૂઆતોને યોગ્ય મહત્વ આપવામાં આવતું નથી અને મોટા ઉદ્યોગ જૂથોને ફાયદો પહોંચાડવા માટે ખેડૂતોના હિતોની અવગણના થઈ રહી છે. ખેડૂતોના જણાવ્યા મુજબ, જમીનના બજાર ભાવના ચાર ગણા વળતરના નિયમોનો પણ યોગ્ય અમલ થતો નથી.
આ મુદ્દે આગામી 12મીએ યોજાનારી રજૂઆત બાદ સરકારનું વલણ શું રહે છે તેના પર સૌની નજર છે. માંગણીઓનો સંતોષકારક ઉકેલ નહીં આવે તો આંદોલન વધુ ઉગ્ર બનવાના સંકેતો ખેડૂતો દ્વારા આપવામાં આવ્યા છે.
