ભરૂચના કાસવા ગામ તરફ જવાના રોડ પરની ઘટના
ભરૂચ.
ભરૂચ તાલુકાના ભાડભૂત ગામે રહેતાં ભરત બુધાભાઇ વસાવા દહેજની કંપનીમાં નોકરીએ ગયાં હતાં. તે વેળાં તેમની પત્નીએ તેમને ફોન કરીને જાણ કરી હતી કે, કાલીદાસ દાદા ભાડભૂતથી કાસવા રોડ પર લાકડા કાપવા માટે ચાલતા ચાલતા જતાં હતાં. તે વેળાં એક સરકારી એસટીએ તેમને અકસ્માત સર્જતાં તેમને ગંભીર ઇજાઓ થઇ છે. જેથી તેમને ભરૂચ સિવિલ હોસ્પિટલમાં દાખલ કર્યાં છે. જેથી તેઓ તુરંત સિવિલ હોસ્પિટલ પર પહોંચી પુછપરછ કરતાં તેમના દાદાને આઇસીયુમાં દાખલ કર્યાં હોવાનું માલુમ પડ્યું હતું. તપાસ કરતાં માલુમ પડ્યું હતું કે, બસના ડ્રાઇવર પણ ત્યાં હાજર હતાં. તેમના દાદાને ગંભીર ઇજાઓ થઇ હોવાથી તેઓ બેભાન અવસ્થામાં હોવાનુ માલુમ પડ્યું છે. બનાવને પગલે તેમણે ભરુચ તાલુકા પોલીસ મથકે ફરિયાદ નોંધાવતાં પોલીસે ગુનો નોંધી આગળની કાર્યવાહી હાથ ધરી છે.
