ભરૂચ જિલ્લામાં દીવસેને દિવસે તસ્કરોનો આતંક વધી રહ્યો હોય તેમ લાગી રહ્યું છે. ભરૂચ, અંકલેશ્વરની સોસાયટી વિસ્તારોમાં રોજ મ રોજ ચોરીઓની ઘટનાઓ સામે આવતી હોય તેવી સ્થિતિનું સર્જન વર્તમાન સમયમાં જોવા મળી રહ્યું છે. તેવામાં હવે ભરૂચના પશ્ચિમ વિસ્તારમાં આવેલ મુઝમ્મીલ પાર્ક સોસાયટી વિસ્તારમાં ચારથી પાંચ તસ્કરો રાત્રીના સમયે લટાર મારતા દેખાતા વિસ્તારમાં ફફડાટ છવાયો છે.
ભરૂચ શહેરના શેરપુરા વિસ્તારને અડીને આવેલા મુઝમ્મીલ પાર્ક વિસ્તારમાં રાત્રીના સમયે સોસાયટીમાં તસ્કરોની દોડધામના દ્રશ્યો સોસાયટીમાં લાગેલ સીસીટીવી કેમેરા કેદ થતા વિસ્તારમાં તસ્કરોના આતંકને લઈ લોકો વચ્ચે ચકચાર મચ્યો છે. રાત્રીના સમયે સોસાયટીના માર્ગો પર રેકી કરી બિન્દાસ અંદાજમાં ફરતા તસ્કરોના ખોફથી પશ્ચિમ વિસ્તારમાં આવેલ જે તે સોસાયટીઓના રહીશોની ઊંઘ હરામ થઈ છે.
ભરૂચના પશ્ચિમ વિસ્તારમાં મનુબર રોડથી લઇ શેરપુરા વિસ્તાર સુધીની રોડ ટચ સોસાયટીઓમાં અવારનવાર તસ્કરો પોતાની કરતૂતોને અંજામ આપવા માટે રાત્રીના સમયે દેખાઈ દેતા હોય છે તો કેટલક બનાવોમાં તો મકાનના નકુચા તોડી ચોરીઓની ઘટનાને પણ અંજામ આપતા હોય છે. તેવામાં વધુ એકવાર મુઝમ્મીલ પાર્ક સોસાયટીમાં તસ્કરોએ દેખાઈ દીધી હોવાના સીસીટીવી ફૂટેજ વાયરલ થયા છે. જેમાં સોસાયટીમાં લટાર મારતા તસ્કરો નજરે પડી રહ્યા છે.
ઘટનામાં ચોરીને અંજામ આપે તે પહેલાં જ એક તસ્કર મકાનના ધાબા પરથી નીચે પડતા સોસાયટીના રહીશોના ટોળા ભેગા થયા હતા જ્યાં એક તસ્કરને લોકોએ ઝડપી પાડી તેને ભરૂચ બી ડીવીઝન પોલીસને હવાલે કર્યો હતો તો અન્ય બે થી ત્રણ તસ્કરો સ્થળ પરથી ફરાર થવામાં સફળ થયા હોવાનું જાણવા મળી રહ્યું છે.
હારુન પટેલ : ભરૂચ
મો. : 99252 22744
