ભરૂચ જિલ્લાના ઝઘડિયા તાલુકાના ઉમલ્લા પોલીસ મથકના TRB જવાન રિક્ષાવાળા પાસેથી રૂપિયા 500 ની લાંચ લેતા ઝડપાયો હોવાનો બનાવ બન્યો હતો.
લાંચના આ બનાવની વિગત જોતાં ઝઘડિયાના ઉમધરા ગામે રહેતો જયદિપસિંહ સરદારસિંહ રણા ઉમલ્લા પોલીસ મથકમાં ટ્રાફિક બ્રિગેડ TRB જવાન તરીકે ફરજ બજાવે છે. ઉમલ્લામાં ટ્રાફિક બ્રિગેડ તરીકે ફરજ બજાવતા આ જવાને રીક્ષા ચાલક પાસે હપ્તાની માંગણી કરી હતી. રીક્ષા ચાલક ફરીયાદી પોતાની મહિન્દ્રા આલ્ફા ડીલક્ષ રીક્ષા ઉમલ્લાથી પાણેથા રૂટ ઉપર પેસેન્જર વાહન તરીકે ફેરવે છે. ફરીયાદીને ઉમલ્લા રૂટમાં વાહન ચલાવવા દેવા તેમજ હેરાન ન કરવા માટે માસીક હપ્તા પેટે ₹500/- ની લાંચની માંગણી કરતા ફરીયાદીએ ભરૂચ ACB પોલીસ સ્ટેશનમાં ફરિયાદ કરી હતી.
ACB એ આ ફરિયાદના આઘારે લાંચના છટકાનું આયોજન કર્યુ હતું જેમા ઉમલ્લા TRB જવાન જયદીપસિંહ રણા ઉમલ્લા ચોકડી નજીક ચાની કેબિન પાસે 500 રૂપિયાની લાંચ લેતા રંગેહાથ પકડાઈ ગયો હતો.
ભરૂચ ACB ઇન્સ્પેકટર એસ.વી. વસાવાએ વડોદરા મદદનીશ નિયામક પી.એચ. ભેંસાણીયાના સુપરવિઝનમાં ટ્રેપિંગ કરી આરોપીને ડીટેઇન કરી આગળની તપાસ હાથ ધરી છે.
