ભરૂચના બળેલી ખો વિસ્તારના શ્રીજીપુરી યુવક મંડળ દ્વારા આયુષ અને સ્વદેશી ચિકિત્સા પદ્ધતિના પ્રચાર પ્રસાર માટેની થીમ પર ઇકો-ફ્રેન્ડલી ગણેશજીની સ્થાપના

ભરૂચ જિલ્લામાં હાલ ગણેશોત્સવની ધામધૂમ સાથે ઉજવણી ચાલી રહી છે. શહેરના વિવિધ મંડળો અનોખી થીમ અને સંદેશાત્મક શણગાર સાથે પંડાલોને આકર્ષક બનાવી રહ્યા છે. આવી જ એક અનોખી પહેલ ભરૂચના બળેલી ખો વિસ્તારમાં જોવા મળી રહી છે, જ્યાં શ્રીજીપુરી યુવક મંડળ દ્વારા આ વર્ષે “આયુષ અને સ્વદેશી ચિકિત્સા પદ્ધતિઓ”ના પ્રચાર માટે ઇકો-ફ્રેન્ડલી ગણેશજીની સ્થાપના કરવામાં આવી છે. ભારતીય ઋષિમુનિઓએ શોધેલી પરંપરાગત ચિકિત્સા પદ્ધતિઓ જેમ કે આયુર્વેદ, યોગ, યુનાની, સિદ્ધ અને હોમિયોપેથી, જેને ભારત સરકારનું આયુષ મંત્રાલય પ્રોત્સાહન આપે છે, તેને આધારે આ પંડાલનું શણગાર કરવામાં આવ્યું છે. આ મંડળનો હેતુ જનસામાન્યમાં ભારતીય ચિકિત્સા પદ્ધતિઓ પ્રત્યે જાગૃતિ લાવવાનો છે.મંડળના આગેવાન શ્રી સાગર સેલાટે જણાવ્યું હતું કે, “છેલ્લા ૩૩ વર્ષથી અમે સ્વહસ્તે તૈયાર કરેલી પ્રતિમાઓ દ્વારા ગણેશોત્સવ ઉજવી રહ્યા છીએ. આ માત્ર એક ધાર્મિક વિધિ નહીં, પણ કલા, સંસ્કૃતિ અને શ્રદ્ધાનો અનોખો સંગમ છે. આ વર્ષે અમે પર્યાવરણને અનુકૂળતા સાથે આયુષ ચિકિત્સા પદ્ધતિઓને પ્રોત્સાહન આપવાનો સંદેશ આપ્યો છે.”નાગરિકોમાં આ પંડાલ ખાસ આકર્ષણનું કેન્દ્ર બની રહ્યો છે. યુવક મંડળ છેલ્લા ૩૪ વર્ષથી સતત ઇકો-ફ્રેન્ડલી ગણેશજીની સ્થાપના કરી પર્યાવરણ જાગૃતિ અને સમાજ માટે અનોખો સંદેશ આપતું રહ્યું છે.