ભરૃચ પોલીસે દારૃ સહિત કુલ 1.18 લાખનો મુદ્દામાલ જપ્ત કર્યો
ભરૂચ.
ભરૂચ એ ડિવિઝન પોલીસનો સ્ટાફ પેટ્રોલિંગમાં હતો તે વેળાં ચોક્કસ બાતમી મળી હતી કે, શહેરના ધોળીકુઇ બજાર વિસ્તારમાં કષ્ટભંજન હનુમાન મંદિર પાસે રહેતો કિશન વણઝારા તેની જ્યુપીટર પર ભરૂચ રેલવે સ્ટેશનમાંથી વિદેશીદારૂનો જથ્થો ભરીને સિટી સેન્ટર થઇ ધોળીકૂઇ બજાર તરફ જવાનો છે. જેના પગલે ટીમે સ્ટેશન સર્કલ વિસ્તારમાં અલગ અલગ સ્થળે વોચ ગોઠવી હતી. દરમિયાનમાં તે તેની જ્યુપિટર પર પંડિત દિનદયાળ ભોજનાલય પાસે પહોંચતા પોલીસે તેને ઝડપી પાડ્યો હતો. તેની જ્યુપીટર પર આગળ વિદેશીદારૂનો જથ્થો ભરેલાં બે મિણીયા થેલા હોઇ તેમાં તપાસ કરતાં અલગ અલગ બ્રાન્ડની કુલ 78 હજારના મત્તાની દારૂની બોટલો તેમને મળી આવી હતી. પોલીસે તેની ઉલટ પુછપરછ કરતાં તેણે કબુલ્યું હતું કે, વલસાડનો સંજય યાદવ તેને ભરૃચ રેલવે સ્ટેશનમાં તેને દારૂનો જથ્થો આપી ગયો હતો. જે તે છુટક વેચાણ કરી પોતાનો ખર્ચો કાઢતો હતો. પોલીસે તેની પાસેથી દારૂ, એક મોબાઇલ તેમજ જ્યુપિટર મળી કુલ 1.18 લાખનો મુદ્દામાલ જપ્ત કર્યો હતો.
