ભરૂચના મોટા ડભોયાવાડ વિસ્તારમાં જાહેરમાં તલવાર લહેરાવી લોકોમાં ભયનો માહોલ ઉભો કરનાર એક શખ્સને પોલીસે ઝડપી પાડ્યો છે. ઘટનાનો વીડિયો સોશિયલ મીડિયા પર વાયરલ થતાં જ પોલીસ તંત્ર સક્રિય બન્યું હતું.
મળતી માહિતી મુજબ, 30 મે 2026ની રાત્રે મોટા ડભોયાવાડ વિસ્તારમાં આંતરિક ઝઘડાની ઘટના બની હતી. આ દરમિયાન મલબારી દરવાજા વિસ્તારનો રહેવાસી મોહંમદહુસેન મિયાએહમદ પટવા પોતાના ઘરેથી તલવાર લઈને ઘટનાસ્થળે પહોંચ્યો હતો.
આરોપીએ જાહેરમાં તલવાર લહેરાવી આસપાસના લોકોમાં ભય અને દહેશત ફેલાવવાનો પ્રયાસ કર્યો હતો. સમગ્ર ઘટનાનો વીડિયો સોશિયલ મીડિયા પર ઝડપથી વાયરલ થયો હતો. વીડિયો સામે આવતા ભરૂચ શહેર બી-ડિવિઝન પોલીસે તપાસ હાથ ધરી તાત્કાલિક આરોપીને ઝડપી પાડ્યો હતો.
પોલીસે આરોપી વિરુદ્ધ ગુનો નોંધી કાયદેસરની કાર્યવાહી શરૂ કરી છે. સાથે જ જાહેરમાં હથિયારો સાથે દાદાગીરી અથવા કાયદો-વ્યવસ્થાને પડકારતી પ્રવૃત્તિઓ સામે કડક કાર્યવાહી કરવામાં આવશે તેવી ચેતવણી પણ ઉચ્ચારી છે.
