ભરૂચ જિલ્લાના અંકલેશ્વર ખાતે શનિવારે કેન્દ્ર સરકારના શ્રમ અને રોજગાર મંત્રાલય દ્વારા પ્રધાનમંત્રી વિકસિત ભારત રોજગાર યોજના (PM-VBRY) અંતર્ગત લાભોના વિતરણ માટે વિશેષ પ્રાદેશિક કાર્યક્રમનું આયોજન કરવામાં આવ્યું હતું. અંકલેશ્વર GIDC એસ્ટેટ સ્થિત અંક્લેશ્વર ઇન્ડસ્ટ્રીઝ એસોસિએશનના BEIL સેમિનાર હોલ ખાતે યોજાયેલા આ કાર્યક્રમમાં ગુજરાત સરકારના જળસંપત્તિ અને પુરવઠા મંત્રી (સ્વતંત્ર હવાલો) ઈશ્વરસિંહ પટેલ મુખ્ય અતિથિ તરીકે ઉપસ્થિત રહ્યા હતા.
દેશવ્યાપી સ્તરે આ યોજનાનો મુખ્ય કાર્યક્રમ વિજ્ઞાન ભવન ખાતે યોજાયો હતો, જ્યાં નરેન્દ્ર મોદી એ દેશભરના 15 લાખથી વધુ લાભાર્થીઓને કુલ રૂ. 2,400 કરોડના પ્રોત્સાહનોનું વિતરણ કર્યું હતું. આ રાષ્ટ્રીય કાર્યક્રમના ભાગરૂપે દેશભરમાં 274 સ્થળોએ એકસાથે પ્રાદેશિક કાર્યક્રમો યોજાયા હતા, જેમાં અંકલેશ્વર પણ સામેલ રહ્યું.
અંકલેશ્વર ખાતે યોજાયેલા કાર્યક્રમ દરમિયાન વિવિધ ઉદ્યોગગૃહો અને નિયોક્તાઓ દ્વારા 16 નવનિયુક્ત યુવા કર્મચારીઓને રોજગાર પત્રો એનાયત કરવામાં આવ્યા હતા. યુવાનોને મળેલા આ રોજગાર પત્રો તેમના વ્યાવસાયિક જીવનની નવી શરૂઆતનું પ્રતિક બન્યા હતા.
કાર્યક્રમને સંબોધતા મંત્રી ઈશ્વરસિંહ પટેલ એ જણાવ્યું હતું કે, પ્રધાનમંત્રી નરેન્દ્ર મોદી ના નેતૃત્વ હેઠળ આ યોજના દેશના યુવાનો, ઉદ્યોગો અને ભારતના આર્થિક ભવિષ્ય માટે પરિવર્તનકારી સાબિત થઈ રહી છે. તેમણે જણાવ્યું કે રૂ. 99,446 કરોડના વિશાળ બજેટ સાથે અમલમાં મૂકાયેલી આ યોજના આગામી બે વર્ષમાં 3.5 કરોડથી વધુ નવી રોજગારીની તકો ઊભી કરવાના લક્ષ્યાંક સાથે આગળ વધી રહી છે.
નવી દિલ્હીથી જીવંત પ્રસારણ મારફતે જોડાયેલા લાભાર્થીઓને સંબોધતા પ્રધાનમંત્રી નરેન્દ્ર મોદી એ જણાવ્યું હતું કે કેન્દ્ર સરકાર યુવાનોને સશક્ત બનાવવા અને રોજગાર સર્જનને વેગ આપવા માટે પ્રતિબદ્ધ છે. તેમણે જણાવ્યું કે ઇન્ફ્રાસ્ટ્રક્ચરમાં થયેલું રૂ. 12 લાખ કરોડથી વધુનું રોકાણ દેશ માટે રોજગારી સર્જવાનું મજબૂત આધાર બની રહ્યું છે.
પ્રધાનમંત્રીએ પ્રધાનમંત્રી મુદ્રા યોજનાનો ઉલ્લેખ કરતાં જણાવ્યું કે આ યોજના હેઠળ આપવામાં આવેલી રૂ. 33 લાખ કરોડથી વધુની સહાય દ્વારા કરોડો યુવાનોને સ્વરોજગાર સ્થાપવામાં મદદ મળી છે. તેમણે મહિલા સશક્તિકરણ અંગે પણ ભાર મૂકતાં કહ્યું કે દેશમાં 10 કરોડથી વધુ મહિલાઓ સ્વસહાય જૂથો (SHGs) સાથે જોડાયેલી છે અને 3 કરોડથી વધુ મહિલાઓ ‘લખપતિ દીદી’ તરીકે ઉભરી આવી છે.
તેમણે વધુમાં જણાવ્યું કે PM SVANidhi અને PM Vishwakarma જેવી યોજનાઓ નાના વેપારીઓ અને કારીગરોને નવી તાકાત આપી રહી છે. ભારતના સ્ટાર્ટઅપ ઇકોસિસ્ટમની ચર્ચા કરતાં તેમણે જણાવ્યું કે એક દાયકાં પહેલાં દેશમાં માત્ર 500 જેટલા સ્ટાર્ટઅપ્સ હતા, જ્યારે આજે આ સંખ્યા વધીને 2 લાખથી વધુ રજીસ્ટર્ડ સ્ટાર્ટઅપ્સ સુધી પહોંચી છે.
મુખ્ય કાર્યક્રમમાં કેન્દ્રીય શ્રમ અને રોજગાર તથા યુવા બાબતો અને રમતગમત મંત્રી મનસુખ માંડવિયા એ જણાવ્યું હતું કે, વર્ષ 2014 પહેલાં શ્રમિક અને ઉદ્યોગલક્ષી સુધારાઓને અલગ દ્રષ્ટિએ જોવામાં આવતા હતા, પરંતુ આજે બંનેને રાષ્ટ્રનિર્માણના સમાન ભાગીદાર તરીકે જોવામાં આવે છે. તેમણે ચાર શ્રમ સંહિતાઓના અમલીકરણને શ્રમિકોના ગૌરવ અને સુરક્ષાની દિશામાં ઐતિહાસિક પગલું ગણાવ્યું.
અંકલેશ્વર ખાતે આયોજિત આ સમારોહમાં મંત્રી ઈશ્વરસિંહ પટેલ ઉપરાંત ઉદ્યોગ જગતના પ્રતિનિધિઓ, વિવિધ એસોસિએશનોના હોદ્દેદારો, જનપ્રતિનિધિઓ, રાજ્ય સરકારના વરિષ્ઠ અધિકારીઓ તેમજ EPFOના અધિકારીઓ અને કર્મચારીઓ સહિત આશરે 275 જેટલા મહાનુભાવો ઉપસ્થિત રહ્યા હતા.
આ કાર્યક્રમ રોજગાર સર્જન, યુવા સશક્તિકરણ અને વિકસિત ભારતના સંકલ્પને સાકાર બનાવવાના પ્રયાસોમાં મહત્વપૂર્ણ કડી તરીકે જોવામાં આવી રહ્યો છે।
