ભરૂચ :
ભરૂચ જિલ્લા મહિલા કોંગ્રેસ દ્વારા મોંઘવારીના વિરોધમાં શહેરના પાંચબત્તી સર્કલ ખાતે વિરોધ પ્રદર્શન યોજવામાં આવ્યું હતું. જિલ્લા મહિલા કોંગ્રેસ પ્રમુખ સહિત જિલ્લા, શહેર અને તાલુકા કોંગ્રેસની મહિલા આગેવાનો અને કાર્યકરો મોટી સંખ્યામાં ઉપસ્થિત રહી ભાજપ સરકાર સામે વિરોધ નોંધાવ્યો હતો.
મહિલા કોંગ્રેસ દ્વારા આક્ષેપ કરવામાં આવ્યો હતો કે છેલ્લા કેટલાક સમયથી ખાંડ, ગોળ સહિત અનેક ખાદ્ય અને જીવનજરૂરી ચીજવસ્તુઓના ભાવમાં સતત વધારો થઈ રહ્યો છે. વધતી મોંઘવારીના કારણે સામાન્ય અને મધ્યમવર્ગીય પરિવારોના ઘરનું બજેટ ખોરવાઈ રહ્યું છે. રોજિંદા જીવનમાં ઉપયોગી વસ્તુઓના ભાવ વધતા મહિલાઓને ઘર ચલાવવામાં મુશ્કેલી પડી રહી હોવાનો પણ વિરોધ દરમિયાન આક્ષેપ કરવામાં આવ્યો હતો.
પાંચબત્તી સર્કલ ખાતે એકત્ર થયેલી મહિલાઓએ હાથમાં બેનરો સાથે ભાજપ સરકાર સામે નારાબાજી કરી હતી. વિરોધ પ્રદર્શન દરમિયાન મોંઘવારી પર અંકુશ લાવવા અને સામાન્ય લોકોને રાહત આપવા સરકાર સમક્ષ માગ કરવામાં આવી હતી.
મહિલા કોંગ્રેસના આગેવાનોના જણાવ્યા મુજબ સરકાર દ્વારા મોંઘવારી ઘટાડવા માટે અસરકારક પગલાં લેવામાં આવે અને જીવનજરૂરી ચીજવસ્તુઓના ભાવ નિયંત્રણમાં લાવવામાં આવે તે જરૂરી છે. વધતી મોંઘવારીનો સીધો બોજ સામાન્ય પરિવારો પર પડી રહ્યો હોવાથી કોંગ્રેસ દ્વારા આ મુદ્દે આગામી દિવસોમાં પણ વિરોધ કાર્યક્રમો યોજવાની તૈયારી દર્શાવવામાં આવી હતી.
વિરોધ પ્રદર્શન દરમિયાન જિલ્લા, શહેર તેમજ વિવિધ તાલુકાના કોંગ્રેસના મહિલા આગેવાનો અને કાર્યકરો ઉપસ્થિત રહ્યા હતા. મહિલાઓએ વિવિધ સૂત્રોચ્ચાર કરી સરકાર સામે પોતાનો રોષ વ્યક્ત કર્યો હતો.
