ભરૂચ :
ભરૂચ જિલ્લામાં વધતા સાયબર ગુનાઓ સામે નાગરિકોમાં જાગૃતિ ફેલાવવા માટે ‘સાયબર જાગૃતિ રથ’નો પ્રારંભ કરવામાં આવ્યો છે. આ રથ જિલ્લાના અંતરિયાળ ગામડાં તેમજ શાળા-કોલેજો સુધી પહોંચીને વિદ્યાર્થીઓ અને નાગરિકોને સાયબર છેતરપિંડીથી બચવાના ઉપાયો અંગે માર્ગદર્શન આપશે.
સાયબર ક્રાઈમના બનાવોમાં ઓનલાઈન બેંકિંગ, OTP, UPI, સોશિયલ મીડિયા, ફેક લિંક, ડિજિટલ અરેસ્ટ તેમજ વિવિધ પ્રકારની ઓનલાઈન છેતરપિંડીના કિસ્સાઓ સામે આવી રહ્યા છે. જેને ધ્યાનમાં રાખીને સાયબર જાગૃતિ રથ દ્વારા લોકોને અજાણ્યા વ્યક્તિ સાથે OTP, PIN, પાસવર્ડ કે બેંકની વિગતો શેર ન કરવા અંગે સમજ આપવામાં આવશે.
આ ઉપરાંત અજાણી લિંક પર ક્લિક ન કરવું, શંકાસ્પદ ફોનકોલથી સાવચેત રહેવું તેમજ સાયબર છેતરપિંડીનો ભોગ બન્યા બાદ તાત્કાલિક 1930 હેલ્પલાઈન પર સંપર્ક કરવા અંગે પણ લોકોને માહિતગાર કરવામાં આવશે.
સાયબર જાગૃતિ રથના માધ્યમથી જિલ્લાના વિવિધ વિસ્તારોમાં જાગૃતિ કાર્યક્રમો યોજી વધુમાં વધુ લોકો સુધી સાયબર સુરક્ષાનો સંદેશ પહોંચાડવાનો પ્રયાસ કરવામાં આવશે.
