બોલેરો ગાડીમાં ચોરખાનું બનાવી દારુની હેરાફેરી કરતા ઇસમને અંકલેશ્વર શહેર બી ડિવિઝન પોલીસે ઝડપી લીધો

અંકલેશ્વર શહેર બી ડિવિઝન પોલીસને પેટ્રોલિંગ દરમિયાન બાતમી મળી હતી કે એક બંધ બોડીની સફેદ કલરની બોલેરો ગાડી ગેરકાયદેસર ભારતીય બનાવટના વિદેશી દારુનો જથ્થો લઇને આવનાર છે. મળેલ બાતમીના આધારે પોલીસે નેશનલ હાઇવે પર અલગ-અલગ જગ્યાએ વોચ ગોઠવી હતી. દરમિયાન મળેલ બાતમી મુજબની બોલેરો ગાડી આવતા તેને ઉભી રખાવી હતી. પોલીસે તપાસ કરતા આ ગાડીમાં આવેલ ચોરખાનાની આડમાંથી ભારતીય બનાવટના વિદેશી દારુની નાની-મોટી કુલ ૫૫૦ નંગ બોટલો રુ.૧૩૧૦૦૦ ની કિંમતની મળી આવી હતી. પોલીસે આ ભારતીય બનાવટના વિદેશી દારુનો જથ્થો, બોલેરો ગાડી તેમજ એક મોબાઇલ મળી કુલ રુ.૬૩૬૦૦૦ નો મુદ્દામાલ કબજે લઇને આ ગુના હેઠળ શંભુલાલ વેણીરામજી જાટ રહે.સુરખંડ ગામ, જિ.ચિત્તોડગઢ રાજસ્થાનનાને ઝડપી લીધો હતો. પોલીસે આ ગુના અંતર્ગત અશોકભાઇ રહે.સેલવાસ તેમજ દારુનો આ જથ્થો મંગાવનાર અજાણ્યા ઇસમને વોન્ટેડ જાહેર કરીને ગુનો નોંધી કાયદેસર કાર્યવાહી હાથ ધરી હતી.