સુરત જિલ્લાના માંગરોળ તાલુકાના કોસંબા નજીક આવેલી યાર્ન બનાવતી તમન્ના ઇન્ટરનેશનલ પ્રા. લિ. કંપનીમાં મંગળવારના રોજ અચાનક આગ લાગવાની ઘટના સામે આવતા વિસ્તારમાં અફરાતફરીનો માહોલ સર્જાયો હતો. ફેક્ટરીમાંથી ધુમાડાના ગોટેગોટા ઉડતા જોવા મળતા આસપાસના લોકોમાં ભયનો માહોલ ફેલાયો હતો.
મળતી માહિતી મુજબ ફેક્ટરીમાં અચાનક આગ ભભૂકી ઊઠતા કામદારોમાં દોડધામ મચી ગઈ હતી. ઘટનાની જાણ તાત્કાલિક ફાયર વિભાગને કરવામાં આવતા ચાર ફાયર ફાઇટરની ટીમ ઘટનાસ્થળે દોડી આવી હતી. ફાયર કર્મીઓએ ઝડપી કામગીરી હાથ ધરી આગને વધુ ફેલાતી અટકાવી ટૂંકા સમયમાં કાબુ મેળવી લીધો હતો.
પ્રાથમિક રીતે આગ સામાન્ય હોવાને કારણે ફાયર વિભાગે ભારે જહેમત વિના આગને કાબુમાં લઈ લીધી હતી. જોકે આગ લાગતા ફેક્ટરીમાં થોડીવાર માટે ગભરાટનો માહોલ સર્જાયો હતો. સદનસીબે ઘટનામાં કોઈ જાનહાનિ કે ઇજાની માહિતી સામે આવી નથી, જેના કારણે તંત્રએ રાહતનો શ્વાસ લીધો હતો.
ફેક્ટરીમાં યાર્ન ઉત્પાદનનું કામ ચાલતું હોવાથી આગ કઈ પરિસ્થિતિમાં લાગી તે અંગે અનેક અટકળો ચાલી રહી છે. જોકે આગ લાગવાનું ચોક્કસ કારણ હજુ સુધી બહાર આવ્યું નથી. ફાયર વિભાગ દ્વારા સ્થળ પર તપાસ હાથ ધરી આગ શોર્ટ સર્કિટ, ટેકનિકલ ખામી કે અન્ય કોઈ કારણસર લાગી હતી કે કેમ તે દિશામાં તપાસ કરવામાં આવી રહી છે.
સ્થાનિકોના જણાવ્યા મુજબ સમયસર ફાયર ટીમ પહોંચી જતા મોટી દુર્ઘટના ટળી હતી. જો આગ વધુ ફેલાઈ હોત તો ફેક્ટરીમાં મોટા પ્રમાણમાં નુકસાન થવાની શક્યતા હતી.
