પ્રતિનિધી :
નર્મદા જિલ્લાના દેડીયાપાડા તાલુકાના ઘાંટોલી ગામમાં પત્ની સાથે આડા સંબંધ હોવાના વહેમમાં એક યુવક પર ચપ્પુ વડે જીવલેણ હુમલો કરવામાં આવ્યો હોવાની ઘટના સામે આવી છે. હુમલામાં ગળાના ભાગે ગંભીર ઇજાઓ પહોંચતાં ઇજાગ્રસ્તને સારવાર માટે ખસેડવામાં આવ્યો હતો. બનાવ અંગે તિલકવાડા પોલીસ મથકે હત્યાના પ્રયાસ સહિતની ગંભીર કલમો હેઠળ ગુનો નોંધી વધુ તપાસ હાથ ધરી છે.
પોલીસ ફરિયાદ મુજબ, ઘાંટોલી નિશાળ ફળિયામાં રહેતા પ્રકાશભાઈ પાંડીયાભાઈ વસાવા (ઉ.વ. 35)એ નોંધાવેલી ફરિયાદમાં જણાવ્યું છે કે ઘાંટોલી નવા ફળિયામાં રહેતા આશિકભાઈ ઉદેસિંગભાઈ વસાવાને ફરિયાદી અને પોતાની પત્ની અર્ચનાબેન વચ્ચે આડા સંબંધ હોવાનો વહેમ હતો. આ મુદ્દે આરોપી અગાઉ પણ અનેક વખત ફરિયાદી સાથે ઝઘડો કરી ગાળો બોલતો તેમજ જાનથી મારી નાખવાની ધમકીઓ આપતો હોવાનું ફરિયાદમાં જણાવાયું છે.
ફરિયાદ અનુસાર, આરોપી આશિકભાઈ વસાવા ફરિયાદીના ઘરે પહોંચ્યો હતો અને ઉશ્કેરાઈ જઈ મારી નાખવાના ઇરાદે ચપ્પુ વડે હુમલો કર્યો હતો. હુમલા દરમિયાન ફરિયાદીના ગળાના ભાગે ગંભીર અને જીવલેણ ઇજાઓ પહોંચતાં તેમને તાત્કાલિક સારવાર માટે હોસ્પિટલમાં ખસેડવામાં આવ્યા હતા.
બનાવ અંગે તિલકવાડા પોલીસે આરોપી આશિકભાઈ ઉદેસિંગભાઈ વસાવા સામે ભારતીય ન્યાય સંહિતાની સંબંધિત કલમો હેઠળ હત્યાના પ્રયાસનો ગુનો નોંધી કાયદેસરની કાર્યવાહી હાથ ધરી છે. પોલીસે હુમલાના ચોક્કસ કારણો, ઘટનાના સંજોગો તેમજ અન્ય પુરાવાઓના આધારે વધુ તપાસ શરૂ કરી છે.
