ભરૂચ: ભરૂચ ખાતે માસૂમ પાર્ક મદરેસા કમિટી દ્વારા 80મા સ્વાતંત્ર્ય દિવસની ઉજવણી નિમિત્તે વિશેષ કાર્યક્રમનું આયોજન કરવામાં આવ્યું હતું. માસૂમ પાર્ક મદરેસા ખાતે યોજાયેલા કાર્યક્રમમાં ભરૂચ નગરપાલિકાના કાઉન્સિલર સમશાદઅલી સૈયદના હસ્તે રાષ્ટ્રધ્વજ ફરકાવવામાં આવ્યો હતો. ધ્વજવંદન બાદ ઉપસ્થિત સૌએ રાષ્ટ્રધ્વજને સલામી આપી હતી.
આ પ્રસંગે ભરૂચ નગરપાલિકાના કાઉન્સિલર સમશાદઅલી સૈયદ, અમીન પારખેતી, લાલા માસ્ટર, ફારૂક પટેલ, હુસેન કાઠી મસ્જિદ કમિટીના અબ્દુલ રાજ, યાકુબ પટેલ, સિરાજ પટેલ સહિત કમિટીના સભ્યો, મદરેસાના વિદ્યાર્થીઓ, સ્થાનિક આગેવાનો તેમજ મોટી સંખ્યામાં રહેવાસીઓ ઉપસ્થિત રહ્યા હતા.
દેશભક્તિના માહોલ વચ્ચે સ્વાતંત્ર્ય સંગ્રામમાં દેશની આઝાદી માટે સંઘર્ષ કરનારા સ્વાતંત્ર્ય સેનાનીઓ અને શહીદોના બલિદાનને યાદ કરવામાં આવ્યું હતું. ઉપસ્થિત મહાનુભાવોએ રાષ્ટ્રની એકતા અને અખંડિતતા જાળવવા તેમજ દેશની પ્રગતિમાં સૌએ પોતાનું યોગદાન આપવાની જરૂરિયાત પર ભાર મૂક્યો હતો.
કાર્યક્રમ દરમિયાન ખાસ કરીને બાળકો અને યુવાનોમાં દેશપ્રેમની ભાવના વધુ મજબૂત બને અને તેઓ રાષ્ટ્ર પ્રત્યેની પોતાની જવાબદારી સમજે તેવો સંદેશ આપવામાં આવ્યો હતો. શિક્ષણની સાથે રાષ્ટ્રપ્રેમ, સંસ્કાર અને સામાજિક જવાબદારીનું મહત્વ સમજાવવામાં આવ્યું હતું.
માસૂમ પાર્ક મદરેસા કમિટી દ્વારા આયોજિત આ કાર્યક્રમ સૌહાર્દપૂર્ણ અને દેશભક્તિના વાતાવરણમાં સંપન્ન થયો હતો. મદરેસાના વિદ્યાર્થીઓ તેમજ સ્થાનિક રહેવાસીઓની ઉત્સાહભેર ભાગીદારીથી સમગ્ર વિસ્તાર ‘દેશ પ્રથમ’ની ભાવનાથી રંગાયો હતો.
