વાંકલ:
માંગરોળ અને કોસંબા પોલીસ મથક વિસ્તારમાં પશુ સંરક્ષણ ધારા હેઠળ જપ્ત કરાયેલા કુલ 15 વાહનોની જાહેર હરાજી યોજવામાં આવી હતી. રૂ.2.48 લાખની અપસેટ પ્રાઇઝ સામે હરાજીમાં કુલ રૂ.9,04,200ની ઊંચી બોલી ઉપજતાં સરકારને અંદાજ કરતાં અનેકગણી વધુ આવક થવા પામી છે.
માંગરોળ પોલીસ મથક ખાતે યોજાયેલી હરાજીમાં માંગરોળ પોલીસના 13 અને કોસંબા પોલીસના 2 મળી કુલ 15 વાહનો, જેમાં મોપેડ, બાઈક, રિક્ષા અને પિકઅપનો સમાવેશ થાય છે, હરાજી માટે મૂકવામાં આવ્યા હતા.
સમાચારપત્રમાં જાહેર જાહેરાત કરવામાં આવ્યા બાદ મહેસાણા, ભાવનગર, અમરેલી, સુરત, વલસાડ અને નવસારી સહિતના વિવિધ જિલ્લાઓમાંથી કુલ 44 વેપારીઓ હરાજીમાં ઉપસ્થિત રહ્યા હતા. કમિટી દ્વારા તમામ વાહનો માટે રૂ.2.48 લાખની અપસેટ પ્રાઇઝ નક્કી કરવામાં આવી હતી. જોકે, વેપારીઓ વચ્ચે થયેલી સ્પર્ધાત્મક બોલીમાં આ રકમ વધીને રૂ.9,04,200 સુધી પહોંચી હતી.
હરાજીની સમગ્ર રકમ સરકારી ટ્રેઝરીમાં જમા કરવામાં આવશે, જ્યારે સૌથી વધુ બોલી લગાવનાર વેપારીઓને નિયમ મુજબ વાહનો સોંપવામાં આવશે.
હરાજી દરમિયાન સુરત ગ્રામ્ય એસ.પી., પારડી ડી.વાય.એસ.પી. બી.કે. વનાર સહિતના અધિકારીઓ હાજર રહ્યા હતા. ઉપરાંત કોસંબા પીઆઈ ઠુમ્મર, માંગરોળ પીઆઈ દેસાઈ તેમજ બારડોલી આરટીઓના અધિકારીઓ પણ ઉપસ્થિત રહ્યા હતા.
