ભરૂચ :
ભરૂચ નગર સેવા સદન દ્વારા સ્વચ્છતા હી સેવા અભિયાન અંતર્ગત ગુરુવારે શહેરમાં વિશેષ સફાઈ ઝુંબેશ યોજાઈ હતી. રેલવે સ્ટેશનથી ગોદી રોડ સુધી હાથ ધરાયેલી સફાઈ કામગીરીમાં નગરપાલિકા પ્રમુખ દેવેન્દ્ર વસાવા, મુખ્ય અધિકારી હરેશ અગ્રવાલ સહિતના આગેવાનો તેમજ સફાઈ કર્મચારીઓ જોડાયા હતા.
સફાઈ ઝુંબેશ દરમિયાન રેલવે સ્ટેશનથી ગોદી રોડ સુધીના માર્ગો તથા આસપાસના વિસ્તારોમાં સફાઈ કરી કચરો એકત્ર કરવામાં આવ્યો હતો. આ સાથે જાહેર સ્થળોએ સ્વચ્છતા જાળવવા અને કચરો ન ફેલાવવા અંગે નાગરિકોમાં જાગૃતિ ફેલાવવામાં આવી હતી.
વડાપ્રધાન નરેન્દ્ર મોદીના સુશાસનના ૨૫ વર્ષની ઉજવણી અંતર્ગત આ કાર્યક્રમનું આયોજન કરવામાં આવ્યું હોવાનું જણાવાયું હતું. કાર્યક્રમ દરમિયાન નગરપાલિકાના આગેવાનો અને સફાઈ કર્મચારીઓની ઉપસ્થિતિમાં શહેરને સ્વચ્છ અને સુંદર રાખવા અંગે સંદેશ આપવામાં આવ્યો હતો.
નગર સેવા સદન દ્વારા નાગરિકોને પણ સ્વચ્છતા અભિયાનમાં સહભાગી બની પોતાના વિસ્તારને સ્વચ્છ રાખવા તથા જાહેર સ્થળોએ કચરો ન ફેલાવવા અપીલ કરવામાં આવી હતી.
