કુંભારિયા ઢોળાવમાં તસ્કરોનો તરખાટ, પરિવાર સૂતો હતો ને રૂ.26,500ની ચોરી
ભરૂચ : ભરૂચના કુંભારિયા ઢોળાવ વિસ્તારમાં આવેલી વખારિયાચાલમાં પરિવાર ઘરમાં ઊંઘી રહ્યો હતો તે દરમિયાન તસ્કરોએ ઘરમાં પ્રવેશ કરી ચાંદીના સિક્કા, બિસ્કીટ અને રોકડ મળી કુલ રૂ.26,500ની મત્તા ચોરી કરી ફરાર થઈ ગયા હતા. ઘટનાને પગલે વિસ્તારમાં ચકચાર મચી હતી.
વખારિયાચાલમાં રહેતા મોહંમદઅમીન અબ્દુલકાદર શેખ પરિવાર સાથે રાત્રે ઘરમાં સૂતા હતા. મોટો પુત્ર અને તેની પત્ની ત્રીજા માળે, જ્યારે તેઓ પત્ની સાથે વચ્ચેના રૂમમાં અને નાનો પુત્ર તેની પત્ની સાથે નીચેના રૂમમાં સૂતો હતો.
દરમિયાન વહેલી સવારે પાંચ વાગ્યાના અરસામાં મોહંમદઅમીન અને તેમની પત્ની જાગ્યા ત્યારે રૂમના પાછળના ભાગે આવેલી લોખંડની જાળી ખુલ્લી જોવા મળી હતી. બાજુમાં મુકેલી લોખંડની તિજોરી પણ ખુલ્લી હતી અને અંદરનો સામાન વેરવિખેર પડેલો હતો.
પરિવારે તપાસ કરતાં અંદાજે 10 તોલાના ચાંદીના સિક્કા-બિસ્કીટ તથા રોકડા રૂ.2,500 મળી કુલ રૂ.26,500ની મત્તા ગાયબ હોવાનું જણાયું હતું. આ અંગે બી-ડિવિઝન પોલીસ મથકે ફરિયાદ નોંધાવતાં પોલીસે ગુનો નોંધી તસ્કરોને ઝડપી પાડવા તપાસ હાથ ધરી છે.
