વાંકલ:
સુરત ગ્રામ્ય એલસીબીએ દારૂની હેરાફેરી સામે વધુ એક મોટી કાર્યવાહી કરતાં કીમ નજીક વડોદરા નેશનલ એક્સપ્રેસ-વે નં. 4 પર આવેલા મોટી નરોલી ટોલ પ્લાઝા નજીકથી આઈસર ટેમ્પોમાં સંતાડીને લઈ જવાતો વિદેશી દારૂનો જંગી જથ્થો ઝડપી પાડ્યો છે. આ કાર્યવાહીમાં દારૂ, વાહન, મોબાઇલ અને રોકડ સહિત કુલ ₹24.92 લાખનો મુદ્દામાલ કબજે કરવામાં આવ્યો છે.
પોલીસને મળેલી ચોક્કસ બાતમીના આધારે સુરત ગ્રામ્ય એલસીબીની ટીમે એક્સપ્રેસ-વે પર નાકાબંધી ગોઠવી હતી. દરમિયાન સેલવાસ તરફથી વડોદરા તરફ જઈ રહેલા **આઈસર ટેમ્પો (નં. DD-01-J-9157)**ને અટકાવી તપાસ હાથ ધરતાં તેમાંથી વિદેશી દારૂ અને બીયરની 8,028 બોટલો મળી આવી હતી. પોલીસે અંદાજે ₹14.83 લાખની કિંમતનો દારૂનો જથ્થો તેમજ ₹10 લાખની કિંમતનો ટેમ્પો સહિત મોબાઇલ ફોન અને રોકડ રકમ મળી કુલ ₹24,92,396નો મુદ્દામાલ જપ્ત કર્યો હતો.
કાર્યવાહી દરમિયાન ટેમ્પાના ચાલકને ઝડપી પાડી તેની અટકાયત કરવામાં આવી હતી. પ્રાથમિક તપાસમાં દારૂનો જથ્થો સેલવાસથી વડોદરા પહોંચાડવાનો હોવાનું સામે આવ્યું છે.
આ કેસમાં દારૂ ભરાવનાર, પાયલોટિંગ માટે સ્વિફ્ટ કારમાં આગળ ચાલનાર તેમજ વડોદરા ખાતે દારૂનો જથ્થો મંગાવનાર સહિત કુલ પાંચ શખ્સોને વોન્ટેડ જાહેર કરવામાં આવ્યા છે. સમગ્ર મામલે પાલોદ પોલીસ મથકે ગુનો નોંધી ફરાર આરોપીઓને ઝડપી પાડવા માટે આગળની કાયદેસરની કાર્યવાહી હાથ ધરવામાં આવી છે.
