ભરૂચ :
વિશ્વ જડીબુટ્ટી દિવસની ઉજવણી નિમિત્તે રોટરી કોમ્યુનિટી કોર્પ્સ (RCC) ભરુચ દ્વારા પ્રમુખ સ્મિતા સોનીના માર્ગદર્શન હેઠળ ઝઘડિયા સ્થિત કર્મ મલ્ટીસ્પેશિયાલિટી હોસ્પિટલ ખાતે વૃક્ષારોપણ અને ઔષધીય છોડ વિતરણનો સેવા પ્રકલ્પ યોજાયો હતો. પર્યાવરણ સંરક્ષણ, હરિયાળીનું જતન અને ઔષધીય વનસ્પતિ પ્રત્યે લોકોમાં જાગૃતિ લાવવાના હેતુથી આયોજિત કાર્યક્રમને ઉત્સાહભેર પ્રતિસાદ મળ્યો હતો.
કાર્યક્રમ દરમિયાન અંદાજે 500 ઔષધીય તેમજ અન્ય ઉપયોગી છોડનું વિતરણ કરવામાં આવ્યું હતું. સાથે જ હોસ્પિટલ પરિસરમાં વિવિધ વૃક્ષોનું વૃક્ષારોપણ કરીને પર્યાવરણ સંરક્ષણનો સંદેશ આપવામાં આવ્યો હતો. ઉપસ્થિત મહાનુભાવો અને સભ્યોએ આવા સેવાકીય પ્રયાસોને સમયની માંગ ગણાવી આયોજકોની કામગીરીને બિરદાવી હતી.
આ સમગ્ર પ્રોજેક્ટને સફળ બનાવવા ચેરમેન રસ્મિન નાણાવટી તથા ડિરેક્ટર રાજેન્દ્ર બકરેએ સક્રિય ભૂમિકા ભજવી હતી. તેમના આયોજન અને સેવા ભાવનાના કારણે કાર્યક્રમ સુવ્યવસ્થિત રીતે સંપન્ન થયો હતો. કાર્યક્રમમાં રોટરી કોમ્યુનિટી કોર્પ્સ ભરુચના મોટી સંખ્યામાં સભ્યો તેમજ અનેક પાસ્ટ પ્રેસિડેન્ટ્સ ઉપસ્થિત રહ્યા હતા, જેના કારણે કાર્યક્રમ વધુ ભવ્ય અને યાદગાર બન્યો હતો.
કાર્યક્રમના સફળ આયોજન માટે RCC ભરુચ દ્વારા કર્મ મલ્ટીસ્પેશિયાલિટી હોસ્પિટલના ડૉ. શરદ કોઠારી અને શ્રીમતી દક્ષા કોઠારીનો વિશેષ આભાર વ્યક્ત કરવામાં આવ્યો હતો. તેમના સહયોગ અને યજમાનપદના કારણે સમગ્ર કાર્યક્રમ સફળતાપૂર્વક સંપન્ન થઈ શક્યો હતો.
કાર્યક્રમના અંતે RCC ભરુચના સેક્રેટરી સુનય સોનાવાળાએ ઉપસ્થિત મહાનુભાવો, મહેમાનો, સભ્યો અને સહયોગીઓનો આભાર વ્યક્ત કર્યો હતો. વિશ્વ જડીબુટ્ટી દિવસ નિમિત્તે યોજાયેલા આ સેવા પ્રકલ્પે પર્યાવરણ જાળવણી, ઔષધીય વનસ્પતિનું મહત્વ અને સામાજિક જવાબદારીનો સશક્ત સંદેશ આપ્યો હતો.
