દહેજ :
વાગરા તાલુકાના દહેજ પોલીસ મથક વિસ્તારમાં ગેરકાયદેસર હથિયારોની હેરાફેરી અને ઉપયોગ સામે પોલીસ દ્વારા ચાલી રહેલી કાર્યવાહી અંતર્ગત એક યુવકને દેશી બનાવટની પિસ્તોલ સાથે ઝડપી પાડવામાં આવ્યો છે. જિલ્લા પોલીસ વડાના માર્ગદર્શન હેઠળ દહેજ પોલીસના સર્વેલન્સ સ્ટાફે મળેલી ચોક્કસ બાતમીના આધારે આ કાર્યવાહી કરી હતી.
પોલીસને બાતમી મળી હતી કે દહેજ ગામના વાડી ફળિયામાં રહેતો એક ઈસમ દેશી હાથ બનાવટની પિસ્તોલ લઈને ફરી રહ્યો છે. બાતમીને આધારે સર્વેલન્સ સ્ટાફે તાત્કાલિક સ્થળ પર પહોંચી વોચ ગોઠવી તપાસ હાથ ધરી હતી. દરમિયાન શંકાસ્પદ હિલચાલ જણાતા પોલીસે **અનિલકુમાર અરવિંદભાઈ ગોહિલ (ઉંમર 33 વર્ષ, રહે. દહેજ, વાડી ફળિયું)**ને ઝડપી પાડ્યો હતો.
પોલીસે આરોપીની તલાશી લેતાં તેની પાસેથી આશરે રૂ.20 હજારની કિંમતની એક દેશી હાથ બનાવટની પિસ્તોલ મળી આવી હતી. પોલીસે પિસ્તોલ કબજે લઈ આરોપી વિરુદ્ધ કાયદેસરની કાર્યવાહી હાથ ધરી છે.
આ મામલે દહેજ પોલીસે આરોપી અનિલકુમાર ગોહિલ વિરુદ્ધ આર્મ્સ એક્ટની કલમ 25(1)(એ) તેમજ ગુજરાત પોલીસ એક્ટની કલમ 135 હેઠળ ગુનો નોંધી વધુ તપાસ શરૂ કરી છે. આરોપી પાસે આ દેશી બનાવટની પિસ્તોલ ક્યાંથી આવી હતી, તે કોને આપવાની હતી કે તેનો ઉપયોગ કયા હેતુસર કરવાનો હતો તે સહિતની દિશામાં પોલીસે તપાસના ચક્રો ગતિમાન કર્યા છે.
