ભરૂચ: 15 ઓગસ્ટના સ્વાતંત્ર્ય પર્વ નિમિત્તે રોટરી ક્લબ ઓફ નર્મદા નગરી, રોટરેક્ટ નર્મદા નગરી, નેકસોરા અને ક્રિએટ લાસ્ટિંગ ઇમ્પેક્ટ સંસ્થાઓના સંયુક્ત ઉપક્રમે ‘આઝાદી કી શામ-2026’ કાર્યક્રમનું આયોજન કરવામાં આવ્યું હતું. કાર્યક્રમમાં દેશભક્તિ, સંગીત, સંસ્કૃતિ અને પ્રતિભાને પ્રોત્સાહન આપવા સોલો ડાન્સ તથા સોલો કરાઓકે સિંગિંગ સ્પર્ધાનું આયોજન કરાયું હતું.
આ કરાઓકે ગીત સ્પર્ધામાં ભરૂચના જગદીશભાઈ સેડાલાએ બેવડી સિદ્ધિ મેળવી ભરૂચનું ગૌરવ વધાર્યું હતું. તેમણે દેશભક્તિ ગીત **‘છોડો કલ કી બાતેં, કલ કી બાત પુરાની’**ની સુંદર રજૂઆત કરી હતી.
સ્પર્ધામાં વિવિધ કેટેગરીના આશરે 24 જેટલા ગાયકોએ ભાગ લીધો હતો. જેમાં જગદીશભાઈ સેડાલાએ 50 વર્ષથી ઉપરની કેટેગરીમાં પ્રથમ ક્રમ પ્રાપ્ત કર્યો હતો. એટલું જ નહીં, તમામ કેટેગરીના સ્પર્ધકોને સાથે રાખીને કરવામાં આવેલા મૂલ્યાંકનમાં તેમણે દ્વિતીય ક્રમ હાંસલ કર્યો હતો.
તેમની આ સફળતા બદલ આયોજકો તથા ઉપસ્થિતોએ અભિનંદન પાઠવ્યા હતા. સ્વાતંત્ર્ય પર્વની ઉજવણીમાં સંગીતના માધ્યમથી દેશભક્તિની ભાવનાને ઉજાગર કરતી આ સ્પર્ધામાં વરિષ્ઠ વયજૂથમાં પ્રથમ અને સર્વ કેટેગરીમાં દ્વિતીય સ્થાન મેળવી જગદીશભાઈ સેડાલાએ પોતાની ગાયન પ્રતિભાનો પરિચય આપ્યો હતો.
