વાંકલ :
દક્ષિણ ગુજરાતમાં હવામાન વિભાગ દ્વારા ઓરેન્જ એલર્ટ જાહેર કરવામાં આવ્યું છે, ત્યારે આગાહીને પગલે ભાદરવા માસમાં મેઘરાજાએ ધમાકેદાર એન્ટ્રી કરી છે. લાંબા વિરામ બાદ વરસાદનું આગમન થતાં માંગરોળ અને ઉમરપાડા તાલુકામાં ધરતી પાણીથી તરબતર થઈ ગઈ છે. વરસાદના કારણે ખેડૂતોમાં પણ રાહતની લાગણી જોવા મળી રહી છે.
છેલ્લા 24 કલાકમાં નોંધાયેલા વરસાદના આંકડા મુજબ માંગરોળ તાલુકામાં 3 ઈંચ અને ચેરાપુંજી તરીકે ઓળખાતા ઉમરપાડા તાલુકામાં 8.5 ઈંચ જેટલો ભારે વરસાદ ખાબક્યો છે. ઉમરપાડામાં પડેલા ધોધમાર વરસાદથી નીચાણવાળા વિસ્તારોમાં પાણી ભરાવાની સ્થિતિ સર્જાઈ હતી.
લાંબા સમયથી વરસાદ ખેંચાતા પાકને લઈ ચિંતિત બનેલા ખેડૂતો માટે આ વરસાદ રાહતરૂપ બન્યો છે. ખાસ કરીને ખરીફ પાકને વરસાદની તાતી જરૂરિયાત હોવાથી મેઘમહેરથી ધરતીપુત્રોમાં ખુશીની લહેર જોવા મળી રહી છે.
દરમિયાન, હવામાન વિભાગની આગાહીને પગલે તંત્ર પણ એલર્ટ મોડ પર આવ્યું છે અને વરસાદની સ્થિતિ તથા નીચાણવાળા વિસ્તારો પર સતત નજર રાખવામાં આવી રહી છે. આગામી કલાકોમાં પણ ભારે વરસાદની શક્યતા હોવાથી લોકોને સાવચેતી રાખવા અપીલ કરવામાં આવી છે.
